A refinería de Repsol na Coruña iniciará mañá sábado, 11 de xaneiro, a parada de 2020 co cesamento da actividade en escala e en distintas datas de seis unidades de Conversión. O resto das unidades da refinería continuarán coa súa operación habitual.
Esta actuación programada, á que se destinarán máis de 64 millóns de euros, concluirá a finais de marzo. Esta contía inclúe 17 millóns de euros para acometer a distintas actuacións de inspección, mantemento e mellora nas seis unidades, con intervención en 95 equipos; e 4,7 millóns de euros, que se investirán en 33 actuacións orientadas á mellora da seguridade, a fiabilidade, o medio ambiente e a competitividade das instalacións.
Ademais, durante esta parada programada terminará o desenvolvemento dos tres grandes proxectos de redución de emisións de CO2 e de mellora ambiental e da eficiencia enerxética, que contan cun orzamento de 43 millóns de euros. Coas actuacións previstas reduciranse as emisións á atmosfera e conseguirase unha mellora da eficiencia enerxética coa introdución de novos equipos e a modificación dos existentes, así como a incorporación de melloras tecnolóxicas na planta. Todo iso permitirá un aforro de combustible e unha redución das emisións de CO2 de máis de 18.000 toneladas/ano.
A unidade de FCC (Craqueo Catalítico Fluído), na que se farán as principais actuacións, serve para transformar gasoil procedente da destilación atmosférica e sen carga en produtos máis lixeiros e de maior calidade para a elaboración final de combustibles. Forma parte das unidades de Conversión, situadas en Arteixo, que permiten volver procesar fraccións procedentes de destilación de cru, conseguindo produtos destilados de maior calidade.
Na parada, ademais do persoal propio, prevese que cheguen a alcanzarse puntas de 450 profesionais externos traballando diariamente, pertencentes na súa maioría ás 35 empresas auxiliares que participan nos traballos, o que reforza o compromiso da refinería como motor económico.
O obxectivo prioritario de Repsol é que todos os traballadores realicen os traballos de inspección, mantemento e innovación coa máxima seguridade. Por esta razón, todas as persoas que participan na parada teñen obrigatoriamente que posuír uns requisitos de formación en seguridade, que ademais se reforzan con formación específica. Tamén se creou unha coordinación de seguridade formada por persoal propio, técnicos e persoal de prevención de empresas de servizos que funcionará as 24 horas.
A denominación de parada programada refírese ao feito de que os distintos traballos de mantemento e investimentos en innovación non se poden levar a cabo coas unidades en servizo, razón pola que é necesario detelas para poder acometer os labores, que implican unha planificación exhaustiva de mesmo un ano de antelación.
Unha parada ten distintas etapas: proceso de parada da unidade, que pode levar varios días; execución de traballos con revisión programada e finalmente, posta en marcha novamente das unidades.
Tanto na fase de parada das unidades como na fase final de posta en marcha, os procedementos operativos requirirán do envío controlado e puntual aos fachos de excedentes de elementos gasosos propios do proceso para a súa combustión. Por esta razón, en determinados momentos os fachos poderán ter unhas dimensións maiores das habituais, unha circunstancia normal nestas fases do proceso, que se realizan de forma totalmente controlada e segura.
Complexo Industrial
A Coruña
